محتاره لمن تودعيني…يا يمه عندمن تخليني
بين الجفن و العين…ضميني يم حسين
يا يمه عندمن تخليني
زينب اشعدها وصيه من قلب قاسي زمانه
تصرخ بهالليلة أريدن قلبج ايضمني بحنانه
يُمه أعرف بعطف الأمومة محد يعوض مكانه
يمه باجر أظل بحيرتي…آنا و مصايب دنيتي
منهو اليسلي وحشتي…و دمعتي بخدي أمانه
تنزل دمعتي و تشوفيها…و الدنيه وياي أبجيها
بقلبي جرح و اثنين…ضميني يم حسين
يا يمه عندمن تخليني
يمه هذا حسين أشوفه يعثر بدمع المصيبه
نزلت بطوله دمعته ينادي ريضي يالحبيبه
يا من تقولين اصبري يمه و الصبر من وين أجيبه
يمه و حسين أشوفه ابيا وضع…عالخد نزل نهر الدمع
وبدمعته يغسل الضلع…و قصتج قصه عجيبه
كافي دليلي تحيرينه…و حسين أريدج تصبرينه
وين أتجه لاوين…ضميني يم حسين
يا يمه عندمن تخليني
اشلون أشوف الحسن يمه شايل اجروحه اعله إيده
مره ينظر لج بعينه و مره ينظر للصميده
يا من اتشوفين زينب ونة الونه الشديده
شفت الحسن قلبه انجرح…و الليله جم ذبحه انذبح
يمه بوداعج امحير صبح…و اعرفت شنهي اليريده
يمي يقول اعله فرقاها…للموت أمشي اويه ممشاها
و قلبي انجسم نصين…ضميني يم حسين
يا يمه عندمن تخليني
يمه و الكرار أبونه أحسب بنظراته خوفه
نظره يم نعش المصيبه و نظره للأيتام أشوفه
من جلوس ايصلي حيدر يا قلب باجر يعوفه
و يناشدج يم الحسن…لمن جرح قلبه الزمن
و يتذكر أيام المضن…و آنا بالدمعات أطوفه
ابيا عين أشاهد علي الليله…اقبالج يا يمه انهدم حيله
حيرني جرح البين…ضميني يم حسين
ييمه عندمن تخليني
يمه كل إنسان قالوا بالعقل يعرف مصيره
و من يغمض عينه باجر تحضر اتشيعه العشيره
و انت ليش ابليل أظلم شيعج صاحب الغيره
خبريني ليش أخفه القبر…اتلاشه يا يمه الصبر
آنا العزيزه أم الخدر…روح أبو الحمله و ضميره
هالليله قبرج يضيعونه…ليش النشامه اليشيعونه
وسط القلب نارين…ضميني يم حسين
يا يمه عندمن تخليني